Go ovdaguorahallan lea válmmas, de lea alaguoddis áigi mearridit jus son galgá čuoččáldahttit ášši dahje ii.
Jus alaguoddi objektiivvalaš vuođuid mielde árvvoštallá ahte gávdnojit nuogis ollu duođaštusat dasa ahte vávjjehuvvon lea rihkkosa čađahan, de lea alaguoddis geatnegasvuohta čuoččáldahttit ášši. Ollu árvvoštallamat fertejit dahkkot ovdal go mearrádus váldo.
Jus ášši čuoččáldahttojuvvo, de lea alaguoddi doaibma duođaštit duopmostullui ahte rihkus lea čađahuvvon.
Ášši ii čuoččáldahttojuvvo
Jus eai gávdno nuogis duođaštusat ahte rihkus lea čađahuvvon, de ii sáhte ášši čuoččáldahttojuvvot. Dat sáhttá ovdamearkka dihte vuolgit das go vávjjehuvvon gieldá ja ahte ii gávdno vihtan dahje teknihkalaš duođaštus mii čatná vávjjehuvvon olbmo rihkkosii. Muhtumin lea čielggas juo ovdaguorahallamis ahte ii sáhte rihkkosa duođaštit. Alaguoddi mearrida dalle heaittihit ovdaguorahallama.
Dakkár mearrádusas lea seamme mearkkašupmi dego das ahte ášši ii čuoččáldahttojuvvo.
Goappeš guorahallamiidda lea čuožžovaš ahte guorahallan sáhttá álggahuvvot ođđasit jus bohtet ovdan ođđa dieđut rihkkosa birra.
Dat guhte lea šaddan gierdat rihkkosa, áššeoamasteaddji, oažžu álohii dieđu das makkár mearrádusa alaguoddi lea váldán.