Oikeuslaitos tekkee työtä yksittäisen ihmisen turvalisuuen ja varmuuen puolesta. Tavote oon ette vähentää rikolisuutta ja lisätä ihmisitten turvalisuutta.
Oikeuslaitos vastaa rikoksitten ehkäsemisestä (förebyggande) ja selvittämisestä, syytheitten nostamisesta, tuomituitten seurauksitten totheuttamisesta niinku kans rikosuhritten oikeuksitten valvomisesta. Oikeuslaitoksella meinathaan Poliisia, Syyttäjäviranomhaista, Oikeusmetesiinilaitosta (Rättsmedicinalverket), Eko-rikosviranomhaista, Kriminaalihoitoa, Ruottin Tuomioistuimia, Tuomioistuinlaitosta, Rikosestämisraatia (Brottsförebyggande rådet) ja Rikosuhriviranomhaista.
Jystiitsiedeparttementti Hallituskansliissa vastaa muumuassa oikeuslaitoksen viranomhaisista ja lainsäätänöstä aluheila siviilioikeus, valtio-oikeus, prusessioikeus ja rangastusoikeus. Hallituksen webbpaikala oon tietoa hallituksen politiikasta ja päätöksistä ja proposisjuunista, selvitysehotuksista ja muusta.
Lue enämpi oikeuslaitoksen viranomhaisista länkistä tässä oikealla. Oikealla oon kans länkki folderhiin "Ruottin oikeuslaitos – alustavvaa tietoa", julkassu Jystiitsiedeparttementti.