Ko ihmistä kohthaan tehhään rikos, se oon ussein traumaattista ja pölättävvää ja jokku rikosuhrit saattava tarvita tukea ette selvitä oikeusprusessista. Oikeuslaitoksella (rättsvä-sendet) oon velvolisuus tukea sitä jota kohthaan oon tehty rikos.
Esitutkimuksen (rikosselvitys) aikana syyttäjä häätyy ottaa huomihoon niin semmosheen asihhaan joka puhhuu eppäiltyn puolesta ko häntä vasthaan. Syyttäjä häätyy olla puolueton ja objektiivi.
Samala ko syyttäjä häätyy olla objektiivi, rikosuhri joskus toivoo syyttäjän tukea. Se saattaa olla vaikea tilane. Mutta ei se puhu objektiivisuutta vasthaan, ette syyttäjä antaa ylheistä tietoa, ko hän esimerkiksi kertoo miten oikeuenkäynti tapahtuu. Mutta syyttäjä ei saa keskustella rikosuhrin kans esimerkiks siittä mitä rikosuhrin pitäs sanoa ko häntä kuulustelhaan tuomioistuimessa.